2Ki 20 | NdeIBE | STEP | Ngalezonsuku uHezekhiya wagula, waba seduze lokufa. Umphrofethi u-Isaya indodana ka-Amozi waya kuye wafika wathi: “Nanku okutshiwo nguJehova: Lungisa indlu yakho, ngoba uzakufa; awuyikusila.”

2 Kings 20

Ukugula KukaHezekhiya

1 Ngalezonsuku uHezekhiya wagula, waba seduze lokufa. Umphrofethi u-Isaya indodana ka-Amozi waya kuye wafika wathi: “Nanku okutshiwo nguJehova: Lungisa indlu yakho, ngoba uzakufa; awuyikusila.”

2 UHezekhiya waphendula ubuso bakhe wakhangela emdulini wakhuleka kuJehova wathi, 3 “Khumbula, O Jehova ukuthi bengiziphethe njani phambi kwakho ngokwethembeka, ngokuzinikela ngenhliziyo yami yonke njalo ngenze okulungileyo emehlweni akho.” UHezekhiya walila kabuhlungu.

4 U-Isaya engakasuki egumeni elingaphakathi, kwafika ilizwi likaJehova kuye lisithi: 5 “Buyela uyetshela uHezekhiya, umkhokheli wabantu bami uthi, ‘Nanku okutshiwo nguJehova, uNkulunkulu kayihlo uDavida. Uthi: Ngiwuzwile umthandazo wakho njalo ngizibonile lezinyembezi zakho; ngizakusilisa. Ngosuku lwesithathu kusukela khathesi uzakhwela uye ethempelini likaJehova. 6 Ngizakwengezelela iminyaka elitshumi lanhlanu empilweni yakho. Ngizakukhulula wena kanye lawo umuzi esandleni senkosi yase-Asiriya. Ngizawuvikela umuzi lo ngizenzela mina njalo ngisenzela inceku yami uDavida.’ ”

7 U-Isaya wathi: “Lungisani ligoqele isinkwa somkhiwa.” Bakwenza lokho basebethoba ngaso ithumba, wasesila.

8 UHezekhiya wayebuze u-Isaya wathi, “Yisibonakaliso bani sokuthi uJehova uzangisilisa kanye lokuthi ngizakhwela ngiye phezulu ethempelini likaJehova ngosuku lwesithathu kusukela khathesi na?”

9 U-Isaya waphendula wathi, “Nansi isibonakaliso sikaJehova kuwe, esokuthi uJehova uzakwenza akuthembisayo. Kambe isithunzi sizakuya phambili amanyathelo alitshumi kumbe sizabuyela emuva amanyathelo alitshumi na?”

10 UHezekhiya wathi kulula ukuba isithunzi siye phambili amanyathelo alitshumi, kodwa kasiyi emuva amanyathelo alitshumi.”

11 Ngakho umphrofethi u-Isaya wacela kuJehova, uJehova wenza ukuthi isithunzi sibuyele emuva okwamanyathelo alitshumi esasehle ngawo ekhwelelweni lika-Ahazi.

Izithunywa Ezazivela EBhabhiloni

12 Ngalesosikhathi uMerodakhi-Bhaladani indodana kaBhaladani inkosi yaseBhabhiloni wabhalela uHezekhiya izincwadi wamthumela lesipho ngoba wayezwile ngokugula kukaHezekhiya. 13 UHezekhiya wazamukela izithunywa wasezitshengisa konke ayelakho eziphaleni zakhe, isiliva, igolide, iziyoliso kanye lamafutha acengekileyo, izikhali zakhe kanye lakho konke okwakuphakathi kwengcebo yakhe. Akulalutho esigodlweni sakhe loba embusweni wakhe wonke uHezekhiya angazange azitshengise lona.

14 Ngakho umphrofethi u-Isaya waya ku-Hezekhiya inkosi wambuza wathi, “Atheni amadoda layana njalo avela ngaphi?” UHezekhiya wathi: “Avela elizweni elikhatshana. Avele eBhabhiloni.”

15 Umphrofethi wabuza njalo wathi: “Aboneni esigodlweni sakho?” UHezekhiya wathi, “Abone konke okusesigodlweni sami. Akukho loba okukodwa phakathi kokuligugu kwami engingawatshengisanga khona.”

16 Ngakho u-Isaya wathi kuHezekhiya, “Zwana nanti ilizwi likaJehova lithi: 17 Isikhathi siyeza ngeqiniso lapho konke okusesigodlweni sakho lalokho okhokho bakho abakugcinayo kuze kube lamuhla kuzathwalelwa eBhabhiloni, kakuyikusala lutho, kutsho uJehova. 18 Abanye besizukulwana sakho, abenyama legazi lakho, abazazalwa nguwe, bazathathwa bayekuba ngabathenwa esigodlweni senkosi yaseBhabhiloni.”

19 UHezekhiya wathi: “Ilizwi likaJehova alikhulumileyo lilungile.” Yena wayenakana esithi: “Kambe kakuyikuba lokuthula lokuvikeleka ngisaphila na?”

20 Ezinye izehlakalo zombuso kaHezekhiya, konke ukuphumelela kwakhe lokwakha kwakhe ichibi kanye lomgelo owaletha amanzi phakathi komuzi, akulotshwanga yini egwalweni lwembali yamakhosi akoJuda na? 21 UHezekhiya waya ekuphumuleni kubokhokho bakhe. Indodana yakhe uManase yathatha ubukhosi.